هي تفرق ؟؟؟

طيب افهمك ...

تخيل معايا كدا ... انك لا قدر الله ... لا قدر الله ... جاتلك حالة فقدان ذاكرة ...

تخيل كدا بس ...

تفتكر اية الاسئلة اللي ممكن تسألها ...
.
.
.
.
.
.


هتسأل شوية اسئله .. معناها الوحيد انك تايه وعايز حد يعرفك الطريق ..

.
.
.
.
.

انا مين ؟؟؟

انا عندي كام سنة ؟؟؟

انا بحب ايه ومبحبش ايه ؟؟؟

انا فين ؟؟؟

مين دول ؟؟؟

انا بعمل اية في حياتي ؟؟؟

انا نفسي في ايه ؟؟؟

انا تعبان ولا مش تعبان ؟؟؟

انا الناس بتحبني ولا لا ؟؟؟

دا اللي عنده فقدان ذاكرة .... !

طيب لو الاسئلة دي اتسالت من حد لنفسه ... يبقى دا عنده ايه ؟؟؟

ولو دا مش فقدان ذاكرة يبقى ايه ؟؟؟

هو ممكن الواحد يفقد نفسه ؟؟؟ ولو مؤقتا ؟؟؟

عارف ازاي ممكن الاسئلة دي تتسأل لنفسك ؟؟؟

انا مين ؟؟؟

ايوة انا مين بجد ... انا اللي ادام الناس ولا انا اللي ادام نفسي ... انا اللي عايز اكونه ... ولا انا اللي دلوقتي ومش عاجبني اوي ... انا اللي دلوقتي مش في حالته ... ولا انا اللي كان اصلا قبل الفترة دي جامد وكويس ...!



انا عندي كام سنه ؟؟؟

اه صحيح ... هو انا بعد عمري من ساعة ما اتولدت ... ولا من ساعة ما شخصيتي اتولدت ... ولا من ساعة ما اتغيرت ... ولا من ساعة ما سبت حياتي ... ولا من ساعة موت حد بحبه ... ولا من ساعة ولادة حد بحبه ؟؟؟



انا بحب ايه ومبحبش ايه ؟؟؟

انا بحب نفسي اوي ... ولا مبحبهاش خالص ... ولا بحبها اكتر من اي حد .. ولا بحبها بس اقل من اي حد ...
انا بحب الناس الي حواليا ... انا بحب حاجاتي الصغيرة ... بحب هزاري ... بحب لعبي ... بحب اكون مبسوط ... بحب اكون زعلان ... بحب ابسط اللي حواليا ... بحب اعيش مبسوط وخلاص ... على حساب اي حد ...

بحب الكورة ... بحب العربيات ... بحب الخروج مع اصحابي ... بحب اعمل مقالب ... بحب افتكر صحابي القدام ... بحب ميبقاش عندي صحاب قدام لاني مبنساش حد منهم ...

بحب اشوف طفل صغير بيضحك ... بحب اشوف حد بيرحم اللي حواليه ... بحب اشوف واحس رحمة ربنا سبحانه وتعالى بينا ... ولا بحب اشوف انتقام ربنا من الظلمه ... على حد فهمي لدا ودا ...

بحب ايه انا بجد ...



انا فين ؟؟؟

انا في مكاني الصح ؟؟؟ ولا انا المفروض مكنش هنا خالص ... انا حاسس ان انا هنا اقل من مكاني ... ولا انا هنا في مكان انا جوا نفسي حاسس اني مستحقهوش ؟؟؟



مين دول ؟؟؟

دول عيلتي يعني اقرب الناس ليا واكتر ناس بيحبوني ... ولا هما فعلا بيحبوني اكتر حد بس هما مش اقرب الناس ليا ...
هما دول صحابي بجد اللي انا عايزهم ... ولا هما مش صحابي اللي انا اتمناهم ... ولا انا اللي مش في نفس المكان معاهم ... وانا اللي فارض نفسي عليهم .... رغم ان هما لو معاهم حد احسن مني كان ممكن يفرق معاهم كتير ...

ومين الناس دي ؟؟؟ دول اخواتي في الاسلام فعلا ؟؟؟ ولا دول حد ما بيسدق يلاقي فرصة ياخد حق غيرة عشان هو فاكر نفسة اكتر واحد مخنوق ؟؟؟



أنا بعمل ايه في حياتي ؟؟؟

انا في الكليه .. طالب مجتهد عاوز يشتغل بشهادته اما يخلص ... ولا انا في الكلية تظبيط ومقضيها واهي ايام الواحد بيستمتع بيها قبل الغم ... ولا هي ايام الواحد بيحاول يستمتع بيها برده بس بالمعقول قبل الغم برده ما يبدأ ... ولا اصلا الحياة لونها كحلي ومفيش غم ؟؟؟

طيب ... هو انا بقى بغض النظر عن الكلية بعمل ايه ... بلعب جامز وبتفرج على روتانا سينما و اكشن ... وبعد بليل عالقهوة ولا في النادي وخلاص ...

ولا بقرأ في كتب وبنمي نفسي .. وبحاول استفيد من حياتي ... ولا بعمل كدا وخانق على نفسي ...

ولا بعمل كدا وخانق على نفسي ونفسي اعمل اللي غيرة بيعمله باشد ما بيعمله ..!

وكاني معترف ضمنيا ان هو صح !!!

ولا انا اكتيف مع اللي حواليا وليا في الشغل الخيري .... وحاسس اني كدا بعمل دوري في الحياة ...

ولا انا شايف دوري في الحياة اني اعرف الناس بربنا سبحانه وتعالى .. لان الناس دي فربت تكفر ولازم تخاف من ربنا ...

ولا اعرف الناس بربنا سبحانه وتعالى عشان انا مستمتع بعلاقتي مع ربنا ونفسي كل الناس تبقى كدا ...

ولا انا بعرف الناس بربنا عشان بس ابقى اديت دوري ادام نفسي ... ولو يتحرقوا حتى ميهمنيش ؟؟؟

ولا انا بشتغل في المجتمع مع اي حد يديني دور في الحياة دي .. لان الدنيا دي عابة ... والدنيا دي صغيرة ... والامثال الجامدة دي ...

فبوافق اشتغل مع اي حد يديني برستيج كويس ينفع اعيش بيه .؟

ولا انا مبعملش ولاحاجه من دول اصلا ... ومرتاح على كدا ؟؟؟



انا نفسي في ايه ؟؟؟

نفسك الاهلي ياخد كل حاجه ... وتعد تكسب في الزمالك ... وتغيظ في الزملكاويه ؟؟؟

نفسك تعيش مرتاح في حياتك ... ويبقى عندك عربيه وشقة عالنيل او البحر .. او حتى بيسين ... اهو اي ميه ...

نفسك امك وابوك يبقوا راضييين عنك في حياتك .. عشان هما الخير في الدنيا دي ... ومينفعش تزعلهم ...

نفسك تبقى كبير ومهم ... حتى لو دا على حساب ناس تانية واولهم نفسك !!!

نفسك تخش تنام وانت مرتاح وراضي حتى لو مكنش معاك غير ربع جنيه مخروم !

نفسك تنتقم من كل الناس اللي خانقه عليك دي ... ولا نفسك الموضوع يتظبط معاهم وربنا يهديهم !!!

نفسك تبقى كويس بس منتش مقدر نفسك ولا انت تستحمل ايه ومتستحملش ايه ... فبتتعب في نفسك اكتر ما بتصلحها ...

ولا اصلا انت مش عايز تخش الحتة دي عشان الكابه ... وانت كدا كويس ... وقشطة وايزي موزو وبتاع ...

انت اكتر حاجه نفسك فيها ايه ؟؟؟؟ بجد !



انا تعبان ولا مش تعبان ؟؟؟

وقبل ما اسال نفسي ... لازم اعرف اية الاصعب عندي ... تعبي النفسي ولا الجسدي ... ولا النفسي اللي جاي من الجسدي ... ولا الجسدي اللي جاي من النفسي !!!!

وعشان اقدر احكم على نفسي ... انا بتلكك ولا انا بدلع ولا انا مقصر ولا انا مبشلش مسئولية عشان اسيب حاجه زي دي دلوقتي .. ولا انا اصلا تعباااااااااااااااااان ... ونفسي احس بنفسي ... الاول ... وبعدين ابقى احلم ان حد يحس بيا ...


انا الناس بتحبني ولا لا ؟؟؟

وهي دي حاجه حلوة اصلا بالنسبة لي ولا لا ؟؟؟ ... يعني مخلياني شايف نفسي وبتاع ... ولا دا مخليلي صحاب في كل حتة ودي عزوة ... ولا دا مخليني دايما في حالة التوهان اللي انا حاببها دي ... او على الاقل عايز افضل فيها ...

وتفتكر لو مت اية اللي هيحصل زي ما قريت الموضوع الرائع دا وهسيبلكم اللينك بتاعه في الاخر ...

يعني هتلاقي الناس اللي بتقول انها بتحبك دي هتعبرك ... ولا انت اصلا عارف ان انتوا الاتنين بتمثلوا وكدا كدا انت عارف انهم مش هيعبروك ...

انت عايش لنفسك بس ... ولا الناس اللي حواليك ... ايا كانوا حتى لو كانوا كل البشر ... او اللي في البيت بس .. الناس دي ليها مكان في قلبك وتفكيرك وتصرفاتك ... ولا لا ....

هو دا بجد معنى ان الناس بتحبك ولا لا ...


انا مش عارف اية اللي انا كتبته دا ... بس ... حاسس انه ممكن ينفعني لو قريته بعد شوية ..

ويمكن ... يمكن ... يمكن ...

ينفع حد تاتي ... مش عارف ...

عموما اهي اتكتبت بقى وخلاص ...

وبعد الفاصل دا ... لو قدرت توصل للحتة دي من الكلام الكتير دا ...

جرب اسمع كدا منير ... في الاغنية دي ... جرب بس !


<bgsound src="http://media3.bokra.net/shabab_bokra/hmp3/2007/mo7ammad_monir/1/bokra.net_mohammad_monir-3atshan.mp3" loop="false"></bgsound>
عطشان انا عطشان الدنيا توب قدى وماطيقش انا الغطيان
مركب تاخدنى لبلاد بعاد ولقى يصادفنى من غير ميعاد
زمن ياخدنى لمكان وعطشان انا عطشان ***
تصدفنى كتير وشوش قلوب زى البيوت
طريق مابعرفوش يوماتى عليه بفوت
سنة ورا سنة اضيع هناك هنا فى رحلتى اناالدمعة ليها صوت ***
ليلى مالهش عيون قمرى مالهش لون
دة انا كان لى فى الهوى مشوار اخضر حنون
اهدى يادمعتى ارسى ياخطوتى انسى يادنيتى
كلة علينا يهون .. كله علينا يهون ...

على فكرة ... فكرة الاغنية المعبرة عن الموضوع (اذا كانت معبرة يعني) واخدها انا من الفارس الملثم

وبعدين ابقى روح شوف الموضوع .. بتاع لو حضرتك مت !

هنا

سلام عليكم ...