أنا لسه ... فاكر !

أنا ...

لسه ...

فاكر ... !

أنا لسه فاكرك !

فاكر الشيكولاته اللي كنت بتجيبهالي كل يوم وانت راجع من الشغل ...

فاكر اللعب اللي كنت بتشتريهالي و أنا صغير ...

فاكر لما كنت دايما بتقف في صفي وانا صغير لما ماما كانت تعوذ تعملي حاجه انا مش عايزها ...

فاكر لما كنت بتعلم معايا وانا صغير ... و وانا كبير ...

فاكر لما كنت بخرج معاك ... صاحبي بقى :)

فاكر لما كنت بصلي معاك الجمعه ... ونروح بعد الصلاة نشرب حاجه مع بعض ...

فاكر لما كنت بروح معاك عند جدو الله يرحمه .....

فاكر لما كان العيد معاك له طعم !!!!

فاكر أحلى سلطه كنت باكلها في رمضان في الفطار ... كانت من ايدك ...

وفاكر لما كنا بنسافر سوا ...

وفاكر لما خرجت معاك في اسكندرية وركبنا الترام سوا ...

وتوهتك معايا في محطة الرمل .....

وفاكر لما كنا بنشتري اللبس ...

وفاكر لما كان عندي 5 سنين ومرضيتش اخد الجزمه اللي انتوا نقيتوهالي

واخترت انا جزمه وكنت فرحان بيا اوي اني كبرت وبقيت بختار لنفسي

وحشت ماما يومها عني ... على فكرة انا لسة الجزمه دي محتفظ بيها في دولابي :)

وفاكر لما كنت بتفرج معاك عالكورة ...

وفاكر حضنك اللي في ساعة مضايقتك او مضايقتي ... كنت باحضنك ...

وفاكر لما قعدنا نتكلم وكنت زعلان انا اوي وقعدت اعيط وخدتني في حضنك اوي اوي اوي ...

وفاكر كمان ان الحضن دا معدتش لاقيه دلوقتي ...

وفاكر آخر ليلة ... و أد إيه ربنا كان جبار لكسري ... وحزني ...

وفاكر التليفون اللي عرفت بيه ...

وفاكر الحضن الطويل اللي حضنت فيه ماما واحنا الاتنين كنا بنعيط وسط الناس كلها قدام المستشفى ...

وفاكر آآآآآآآآخر مرة شفتك فيها ...

و آخر بوسه بوستهالك ... في المستشفى ... وكانت أكتر مرة عيطت فيها في حياتي ساعتها ...

و آخر حضن حضنتهولك ... وكان أطول حضن ... بس أنا اللي حضنتك لوحدي !

و فاكر أول مرة أدخل البيت و أنا عارف إني مش هلاقيك فيه تاني ...

وفاكر أول مرة كنت أفهم و أقدر ... انت أد إيه كنت حارم نفسك عشانا ...

ولسة برده فاكر ...

فاكر .. أد إيه زعلتك ...

بس أنا كنت صغير ... وما عرفش حاجه ...

كنت بكتشف الدنيا لسه ... وبتعلمها أصلا ...

أنا غلطت فيارب تكون سامحتني على أي حاجه زعلتك فيها ...

نفسي أسمع صوتك ... ولا أرجع أهزر معاك ...

ولا ألعب معاك من تاني ...

البيت ضلم من ساعتها ....

كان نفسي تفرح بيا ....

أنا فاكرك ... أنا في حاجات ما بعرفش أنساها !

واحشني يا أبويا !










اللهم لا حول ولا قوة الا بالله .....

اللهم لا حول ولا قوة الا بالله .....

اللهم لا حول ولا قوة الا بالله .....

إنا لله و إنا إليه راجعون !

الحمد لله !